Mu gihe u Rwanda rwibuka ku nshuro ya 31 Jenoside yakorewe Abatutsi mu 1994, hari impamvu ituma benshi bongera kumva uburemere bw’amateka n’inkovu yasize ku mitima. Muri uru rugendo, umuryango Rabagirana Ministries, ushingiye ku ndangagaciro za Gikristo, wiyemeje kuba igisubizo kirambye ku bababaye, binyuze mu bikorwa by’isanamitima no kwimakaza urukundo ruvuye kuri Kristo.
Uyu mwaka, ibikorwa byabo byibanze cyane ku rubyiruko, nk’abagenerwabikorwa b’ejo hazaza h’igihugu n’itorero. Rabagirana Ministries yasanze atari ngombwa gusa kwibuka, ahubwo ko ari igihe gikwiye cyo kwakira, kubohoka no gusabana na Kristo, usana ibikomere by’umutima.
Mpore Campaign: Igihe cyo kumva no kumva abandi
Kuva tariki ya 7 kugeza kuya 13 Mata 2025, Rabagirana Ministries yatangije ubukangurambaga bwiswe “Mpore Campaign”, bugamije gutanga umwanya w’ihumure n’isanamitima ku bantu bose bafite ibikomere bitarakira. Aha ni ho abantu basabwa kureka umutima ugatuza, bagasobanurira abandi intimba yabo, kandi bagasenga bafatanyije.
Ahantu hihariye kuri ibi bikorwa ni Umusozi w’Ubumwe (i Rusheshe), aho abantu baturuka mu mateka atandukanye bahurira bakigishwa, bagasabana, bakanasengera hamwe mu matsinda y’isanamitima. Benshi bahamya ko ari umwanya udasanzwe wo kwisanga imbere ya Kristo, Umwami w’amahoro.
“Kwibuka si ukugumya kurira, ni igihe cyo kwemera gukira”
Mama Liza, umubyeyi warokotse Jenoside, utuye i Rusheshe, yatanze ubuhamya bukomeye. Yagize ati: “Nabanje kwanga Imana, narababaye, narakaraga… ariko ibikorwa bya Rabagirana byatumye menya ko Imana itajya ita abantu. Nagiye nkira buhoro buhoro, ubu nsigaye mbwira abana banjye amateka atarimo umujinya ahubwo arimo gukiza.”
Ubuhamya bwe bwibutsa ko umuntu atabasha gusangiza abandi ibyo atarakira, kandi ko ubumwe n’imbabazi bigira imizi muri Kristo.
Urubyiruko rurasabwa kudapfukirana ukuri
Igihozo Takia, umwe mu rubyiruko ruvutse nyuma ya Jenoside, yavuze ko nubwo atari ayibayemo, ingaruka zayo zaramugeraho. Yagaragaje ko gukura utazi amateka yawe bibabaza, asaba bagenzi be kutagendera mu gihirahiro. Ati: “Nimusure inzibutso, mushakishe ukuri, mubuganirize abandi ku mbuga nkoranyambaga aho kwituramira cyangwa gutinya abapfobya.”
Isanamitima si gahunda y’igihe, ni umuhamagaro
Rabagirana Ministries imaze imyaka irindwi ikorera mu Rwanda, ihuza abantu banyuze mu mateka anyuranye barimo abarokotse Jenoside n’abayigizemo uruhare, hagamijwe kugarura icyizere no kunga imitima mu izina rya Yesu. Mu mashuri, mu magereza, mu nsengero no mu bigo bitandukanye, uyu muryango utanga amahugurwa y’isanamitima anashingiye ku ijambo ry’Imana.
Umusozi w’Ubumwe nawo ni umushinga wa Rabagirana Ministries aho abantu bahurira bagakorera hamwe ibikorwa by’iterambere, biga kubana mu mahoro no gufatanya mu bwuzuzanye. Uretse amahugurwa n’ubujyanama, hahurizwa n’ubuhanzi, inyigisho, ibitabo by’ihumure n’amasengesho.
Gusenga, kwemera no kwakira: Inkingi y’ubuzima bushya
Uyu muryango usaba ababyeyi, abayobozi b’amatorero n’abakiri bato, kwibaza niba koko barakize. Niba hari igikomere cyihishe, kikirimo umujinya, urwango cyangwa ububabare butarakira, Kristo niwo muti. Rabagirana Ministries iributsa ko ibikomere bidakizwa no kwiyibagiza, ahubwo bikizwa no kuganira no gushyira umutima imbere y’Imana.
Ijambo ry’Imana rivuga ngo “Niba tugendera mu mucyo nk’uko na we ari mu mucyo, dufitanye ubumwe natwe, kandi amaraso ya Yesu adutukuza icyaha cyose” (1 Yohana 1:7).
Iyo dusanze Kristo mu kuri, ni ho gukira gutangira.nda.
